Бабруйчанка паскардзілася на смецце ў TikTok — яго неўзабаве прыбралі

Жыхарка Бабруйска Анжаліка звярнула ўвагу на праблему, якую, паводле яе слоў, можна ўбачыць у розных частках горада. На відэа, апублікаваным у TikTok, жанчына паказала смеццевую звалку на вуліцы Пралетарскай. Сметніца была перапоўненая, а вакол ляжалі пластыкавыя пакеты, стаканчыкі і іншае смецце.

Чытайце таксама: «Вясна прыйшла — “распусціліся” бутэлькі». Беларусы паказваюць у TikTok, як выглядаюць двары пасля зімы

У роліку яна з іроніяй пракаментавала сітуацыю: «І так усё навокал. Камунальныя службы Бабруйска, вы лепшыя».

Відэа хутка сабрала каментары. Некаторыя карыстальнікі адзначылі, што раней у гэтым раёне такіх праблем не заўважалі, але ў цэлым падобная сітуацыя для горада не новая. Іншыя пісалі, што падобныя перапоўненыя кантэйнеры можна ўбачыць і ў іншых беларускіх гарадах.

Вось, што пісалі людзі:

• «Раней такога не было».
• «Зараз такая карціна паўсюль».
• «У Мінску такія ж самыя сметніцы».
• «Увесь Бабруйск такі».
• «Усю зіму дарожкі не чышчаныя, не пасыпаны нават пяском, у дварах нябачна было, а цяпер падснежнікі ўзышлі. Галоўнае прыгожае відэа зняць як усе працуюць!».

Аднак у каментарах з’явіліся і іншыя меркаванні. Некаторыя карыстальнікі лічаць, што адказнасць за падобныя сітуацыі часткова ляжыць не толькі на камунальных службах, але і на саміх жыхарах, якія пакідаюць смецце побач з кантэйнерамі.

• «Чым вінаваціць камунальныя службы, давайце пачнем з сябе».
• «Гэта не камунальнікі вінаватыя, а вінаватыя людзі, якія гэта робяць».

Што адбылося пасля публікацыі роліка

Праз суткі пасля публікацыі відэа Анжаліка выклала новы ролік з таго ж месца. На ім відаць, што тэрыторыя каля смеццевых кантэйнераў ужо прыбраная — смецця вакол няма, а двор выглядае чыстым.

У подпісе да відэа жанчына адзначыла: «Чысціня ў горадзе — гэта вынік агульных намаганняў улады і жыхароў. Дзякуй вам за любоў да нашага агульнага дома».

Пры гэтым дакладна невядома, хто прыбраў смецце — камунальныя службы ці самі жыхары раёна. Але сітуацыя паказала ў чарговы раз, што пасля публікацыі ролікаў у TikTok, праблемы са смеццем нечакана вырашаюцца.

Чытайце таксама: У Гомельскім раёне смецце вывозяць толькі пасля таго, як жыхары апублікуюць відэа ў сацсетках або звернуцца ў газету

Будь на связи и в безопасности: подключи BGlobal VPN

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро